ຂ່າວທົ່ວໄປ at ຄະນະກຳມະການກິລາແຫ່ງຊາດ

ຂ່າວທົ່ວໄປ

ເລົ່າສູ່ກັນຟັງ: “ເກັບມາຝາກ ຈາກຂອບສະຫນາມ ຈຳປາສັກ ເກມ!”

ຜ່ານພົ້ນໄປແລ້ວ ເປັນມື້ທີ 4 ສຳລັບງານມະຫາກຳ “ຈຳປາສັກ ເກມ” ຫລາຍຫລຽນຄຳ ຖືກຍາດແຍ່ງກັນຢ່າງສະຫນຸກຕື່ນເຕັ້ນ ໂດຍສະເພາະແຂວງເຈົ້າພາບ ມາແຮງປານກັບ ນ້ຳມັນຊຸບເປີ້ແອັດຊັງ ມາຮອດຊົ່ວໂມງນີ້ ກວາດໄປແລ້ວກວ່າ 20 ຫລຽນຄຳ ຈົນເຮັດໃຫ້ແຊ໋ມເກົ່າ 7 ສະໄຫມ ເຊັ່ນ: “ນະຄອນຫລວງວຽງຈັນ” ໄດ້ແຕ່ຢືນແກ່ວງຫົວ ແລະ ເປົ່າປາກບອກວ່າ “ແຊ໋ມສະໄຫມນີ້ ຄົງຈະຫລຸດມືແນ່ນອນ!” ເພາະວ່າຍ່າງເຂົ້າມື້ທີ 5 ແລ້ວ ນະຄອນຫລວງ ຫາກໍໄດ້ມາພຽງ 4 ຫລຽນຄຳ ຍ່າງຕາມຫລັງທັງບໍລິຄຳໄຊ ທີ່ເອົາໄປແລ້ວເຖິງ 10 ກວ່າຫລຽນຄຳ ແລະ ທະນາຄານ ສປປລາວ 4 ຫລຽນຄຳ. ແຕ່ແນວໃດກໍຕາມ, ທີມງານຂອງເພິ່ນບາງຄົນ ກໍປອບໃຈຕົນເອງວ່າ “ເປັນທຳມະດາ ນ້ຳມັນກາຊວນ ເຄື່ອງມັນຮ້ອນຊ້າ” ວ່າຊັ້ນ! ແນວໃດກະຢາກໃຫ້ຂ້ຽວເລັ່ງ ຂ້ຽວຮ້ອນແດ່ກໍດີເນາະ ເພາະໄລຍະນີ້ອາກາດມັນຫນາວ ຢ້ານແຕ່ເຄື່ອງມັນຈະບໍ່ຕິດ ຫລື ຕິດຊ້າເກີນເວລາອັນຄວນ ຊັ້ນຫນາ?

ເຖິງຈະເປັນຄັ້ງທີ VIII ແລ້ວກໍຕາມ ສຳລັບງານມະຫາກຳກິລາແຫ່ງຊາດ, ແຕ່ວ່າ ຫລາຍສິ່ງຫລາຍຢ່າງຍັງຕ້ອງສຶກສາ ແລະ ຖອດຖອນບົດຮຽນກັນອີກຕໍ່ໄປ. ພິທີເປີດ ງານຈຳປາສັກ ເກມ ຄັ້ງນີ້ ເຖິງວ່າຈະໄດ້ຮັບຄຳຍ້ອງຍໍຊົມເຊີຍ ຈາກພໍ່ແມ່ປະຊາຊົນ ທົ່ວປະເທດພໍສົມຄວນ ຫລັງຈາກໄດ້ຊົມການຖ່າຍທອດສົດ ທາງໂທລະພາບແຫ່ງຊາດ ໂດຍສະເພາະພີ່ນ້ອງຊາວແຂວງຈຳປາສັກ ທີ່ຕ້ອງຈົດຈຳໄປອີກດົນ ກັບພາບແຫ່ງຄວາມປະທັບໃຈ ທັງຫລາຍທັງປວງໃນຄັ້ງນີ້ ແຕ່ກໍມີຫລາຍເຫດການທີ່ຖືກຖາມຫາ ແລະ ໃຫ້ເວົ້າເຖິງ. ຮືຮາທີ່ສຸດຕ້ອງຍົກໃຫ້ບັນຫາ “ນັກກິ ລານຳເຂົ້າ!” ທີ່ຫລາຍພາກສ່ວນສົງໃສ ແລະ ທັກທ້ວງແຂວງເຈົ້າພາບວ່າ ນຳເຂົ້ານັກກິລາຕ່າງຊາດ ເຊິ່ງຖ້າຫາກເປັນຄວາມຈິງ ກໍຈະຜິດຕໍ່ກົດລະບຽບການແຂ່ງຂັນ. ແຕ່?ຫລັງການກວດສອບ ກໍປາກົດວ່າ “ບໍ່ເປັນຄວາມຈິງ!” ກຳມະການຝ່າຍເຕັກນິກ ຈັດການແຂ່ງຂັນຢືນຢັນວ່າ ນັກກິລາທຸກຄົນ ທີ່ອະນຸຍາດໃຫ້ລົງແຂ່ງ ແມ່ນຖືກຕ້ອງລະບຽບຂັ້ນຕອນທຸກຢ່າງ. ອັນທີ່ວ່າແປກຫູແປກຕານັກກິລາຈຳປາສັກ ນັ້ນ ກໍຍ້ອນເພິ່ນເອົາໄປເຊື່ອງເກັບໂຕຢູ່ຕາມປະເທດອ້ອມແອ້ມ ວ່າຊັ້ນ! (ສົງໃສຄຳເວົ້າກໍອາດຈະຜິດພ້ຽນໄປແດ່ເນາະ!) ແຕ່ສຸດທ້າຍກໍບໍ່ມີຫຍັງໃນກໍ່ໄຜ່! ຈຳປາສັກ ເກມ ຍັງດຳເນີນໄປຢ່າງຄຶກຄື້ນ ຕາມເດີມ!

?ຫລາຍຄົນ ຫລາຍທ່ານ ທີ່ມີໂອກາດລົງມາຈຳປາສັກ ໄລຍະນີ້ ໂດຍສະເພາະມື້ເປີດການແຂ່ງຂັນ ຕ້ອງຫນັກໃຈສົມຄວນກັບການເລາະຫາໂຮງແຮມບ້ານພັກ ເພາະວ່າຢູ່ໃສກໍເຕັມອື້ຕື້. ຈົນຕ້ອງໄປຊອກຫາພີ່ຫານ້ອງ ເພື່ອຂໍພັກອາໃສ. ແຕ່ກໍບໍ່ມີບັນຫາ ເພາະຮູ້ທັງຮູ້ວ່າ “ພີ່ນ້ອງໄທໃຕ້ເຮົາ ໃຈໃຫຍ່ກວ່າຄອນພະເພັງອີກ!” ວ່າຊັ້ນ! ແຕ່ທີ່ຕ້ອງຕົບມືໃຫ້ ກໍຄືການຄວບຄຸມລາຄາສິນຄ້າ ເຫັນວ່າເຮັດໄດ້ດີ ໂດຍສະເພາະອາຫານການກິນ ຖືວ່າໂອເຄ. ເຝີຖ້ວຍໃຫຍ່ 15.000 ກີບ ຖ້ວຍນ້ອຍ 12.000 ກີບ. ຖ້າຢາກປະຢັດແດ່ ກໍຍ່າງເຂົ້າຕະຫລາດສົດດາວເຮືອງ ຫາກິນໄດ້ຢ່າງຈຸໃຈ ເອົາຕັ້ງແຕ່ຊຸບໜໍ່ໄມ້ ໄປເຖິງພິດຊາ ກໍມີ. ນອກຈາກນັ້ນ ລາຄາລົດສາມລໍ້, ຕຸກໆ ຫລື ຈຳໂບ້ ກໍປະຕິບັດຕາມລາຄາທີ່ທາງການເພິ່ນກຳນົດໃຫ້. ຂໍຊົມເຊີຍ! ແລະ ສືບຕໍ່!

?ຖ້າຢາກສຳຜັດກັບບັນຍາກາດ ທຳມະຊາດໆ ແລະ ເປັນກັນເອງ, ໂດຍສະເພາະ ຍາມຕາເວັນຕົກດິນ ແນະນຳໃຫ້ໄປນັ່ງຈິບເບຍລາວ ເບຍຂອງຄົນລາວ ຄົນຈິງໃຈ, ຟັງລຳກອນ, ລຳເຕີ້ຍ?ສາລະພັດລຳພື້ນບ້ານ ພຽງແຕ່ຂີ່ລົດຂ້າມຂົວໄປທາງເມືອງໂພນທອງ ຫວິດສົ້ນຂົວ ກໍຈະເຫັນປ້າຍທັນທີ “ຮ້ານອາຫານ ລະບຽງພູ” ຮ້ານອາຫານ 1 ໃນ 5 ທີ່ໄດ້ຖືກຮັບຮອງເປັນຮ້ານອາຫານວັດທະນະທຳ ໃນທົ່ວປະເທດ ຮັບຮອງວ່າບັນຍາກາດແບບນີ້ ໃຜໄດ້ໄປສຳຜັດຕ້ອງປະທັບໃຈອາຫລີ!

?ເນື່ອງຈາກກອງເລຂາ ຕັ້ງຢູ່ຫ່າງໄກຈາກສະຫນາມໃຫຍ່ ເຊິ່ງເປັນຖານທັບກອງກຳລັງ ສື່ມວນຊົນພວກເຮົາ ບໍ່ວ່າຈະເປັນສູນຂ່າວ, ສູນຖ່າຍທອດສົດທາງໂທລະພາບ ແລະ ວິທະຍຸ ຈຶ່ງເຮັດໃຫ້ການຕິດຕໍ່ປະສານງານ ໂດຍສະເພາະການສະຫລຸບຫລຽນປະຈຳວັນ ຢ່າງເປັນທາງການ ຈຶ່ງຊັກຊ້າ. ຍິ່ງໄປກວ່ານັ້ນ ເຄື່ອງມືສື່ສານ (ແຟ໋ກ) ຂອງຄະນະກຳມະການເຕັກນິກ ກໍປາກົດວ່າ ມີບັນຫາ. ດັ່ງນັ້ນ, ກອງທັບນັກຂ່າວ ກໍຕ້ອງນຳໃຊ້ຄຳວ່າ “ອັດຕະຮິ ອັດຕະໂນນາໂຖ” ຫລື “ຕົນເປັນທີ່ເພິ່ງຂອງຕົນ” ແລະ ຕ້ອງແບ່ງປັນກຳລັງກັນ ເພື່ອໄປເກັບຜົນຫລ້າສຸດ ແລະ ອັບເດດກັນເອົາເອງ ຈຶ່ງເຮັດໃຫ້ຜົນສະຫລຸບຫລຽນ ຂອງສື່ແຕ່ລະສຳນັກ ອາດຈະບໍ່ກົງກັນ ຄວາມໄວ-ຊ້າ ຂຶ້ນກັບການປິດຂ່າວ ຂອງແຕ່ລະສຳນັກໃຜລາວ.

ສ່ວນຫ້ອງປະຕິບັດງານ ໃນສູນຂ່າວພວກເຮົາ ເຖິງວ່າຈະຄັບແຄບໄປແດ່ ແຕ່ການເຮັດວຽກແບບລວມການສະເພາະກິດ ກໍຄືການແຊໄອເດຍນຳກັນ ກໍເຮັດໃຫ້ສູນຂ່າວພວກເຮົາ ປະ ສົບຜົນສຳເລັດພໍສົມຄວນ ໂດຍສະເພາະການສະຫລຸບຫລຽນທີ່ວ່ອງໄວ ແມ່ນແຕ່ໂຄສົກສະ ຫນາມ ຫລື ຄະນະກິລາຫລາຍພາກສ່ວນ ກໍໄດ້ອາໄສສູນຂ່າວພວກເຮົາ ເພື່ອຕິດຕາມຫລຽນປະຈຳວັນ.

?ເຫລືອອີກພຽງຫນຶ່ງສັບປະດາເທົ່ານັ້ນ, ຈຳປາສັກ ເກມ ກໍຈະໂບກມືອຳລາກັນແລ້ວ, ເຫັນໃຈແຕ່ນັກຂ່າວ ເອີຫລົງ! (ນັກກິລາ) ຫນຸ່ມໆ-ສາວໆ ທີ່ມາຈາກທຸກສາລະທິດ ໃນທົ່ວປະເທດ ຫາກໍໄດ້ມາຮູ້ຈັກຮັກແພງກັນໃນງານຄັ້ງນີ້ ແຕກໍຕ້ອງຈະມາລາຈາກກັນສາແລ້ວ. ແຕ່ກໍບໍ່ເປັນຫຍັງ ເພາະຍຸກນີ້ເປັນຍຸກໄອທີແລ້ວ?ຂໍໄດ້ພຽງເບີໂທລະສັບ, ອີເມລ ກໍເປັນວ່າ ໂລກນີ້ມັນກໍບໍ່ກວ້າງດັ່ງທີ່ຄິດ?ອັນແຫລະ!

ພົບກັນໃຫມ່

“ຄົນຂ້າງສະຫນາມ”

ນັກກິລາ ກະຊວງ ຖ/ວ ໄດ້ຮັບກຳລັງໃຈຈາກການນຳ

ຄະນະນຳ, ຄູຝຶກ ແລະ ນັກກິລາຂອງ ກະຊວງ ຖະແຫລງຂ່າວ ແລະ ວັດທະນະທຳ ທັງ 7 ປະເພດ ໄດ້ຮັບກຳລັງໃຈຈາກການນຳ ກ່ອນຈະເຂົ້າຮ່ວມແຂ່ງຂັນ ໃນງານມະຫາກຳກິລາແຫ່ງຊາດ ຄັ້ງທີ 8 ທີ່ ແຂວງ ຈຳປາສັກ, ໃນທ້າຍອາທິດ ຜ່ານມາ ທ່ານ ຫມູນແກ້ວ ອໍລະບູນ, ລັດຖະມົນຕີ ວ່າການກະຊວງ ຖະແຫລງຂ່າວ ແລະ ວັດທະນະທຳ ພ້ອມຄະນະ ໄດ້ເດີນທາງມາແຂວງ ຈຳປາສັກ ເພື່ອໂອ້ລົມ ແລະ ໃຫ້ກຳລັງໃຈແກ່ນັກກິລາ ເພື່ອສ້າງຜົນງານໃນ ຈຳປາສັກເກມ ໃຫ້ໄດ້ຮັບຫມາກຜົນຕາມຄວາມຄາດຫວັງ, ມີບາງຕອນຂອງການໂອລົມວ່າ: ຄະນະນຳ ກໍ່ຄືນັກກິລາທຸກຄົນ ຈົ່ງເອົາໃຈໃສ່ຕໍ່ການແຂ່ງຂັນ ແລະ ສູ້ຊົນໃຫ້ສຸດຄວາມສາມາດຂອງຕົນທີ່ມີຢູ່ ເພື່ອເຮັດໃຫ້ມວນຊົນເຫັນໄດ້ຄວາມຕັ້ງໃຈ ແລະ ທຸ້ມເທໃນເວລາລົງແຂ່ງຂັນຕົວຈິງໂດຍບໍ່ຫວັ່ນຕໍ່ອຸປະສັກ, ເຖິງແມ່ນວ່າ ຈະພົບກັບຄວາມຫຍຸ້ງຍາກໃນການຍາດແຍ່ງໄຊຊະນະ ກໍ່ຄືຍາດຫລຽນມາຄອງກໍ່ຕາມ, ແຕ່ຂໍຮຽກຮ້ອງໃຫ້ທຸກຄົນຈົ່ງເຮັດສຸດຄວາມສາມາດກໍ່ຖືວ່າດີແລ້ວ, ຖ້າຫາກວ່າເປັນໄປໄດ້ກໍ່ຢາກໃຫ້ນັກກິລາສ້າງຜົນງານດ້ວຍການຍາດ ຫລຽນໃດຫລຽນຫນຶ່ງມາສ້າງຊື່ສຽງໃຫ້ແກ່ກະຊວງ. ຄຽງຄູ່ກັບການຍາດແຍ່ງເອົາໄຊຊະນະນັ້ນ ນັກກິລາ ກໍ່ຄືຄະນະນຳນັກກິລາ ຈົ່ງຮັກສາມູນເຊື້ອນ້ຳໃຈນັກກິລາໃຫ້ສູງ ເພື່ອສ້າງຄວາມປະທັບໃຈແກ່ກອງເຊຍທີ່ມາຮ່ວມງານ.

ສຳລັບປະເພດກິລາທີ່ ກະຊວງ ຖະແຫລງຂ່າວ ແລະ ວັດທະນະທຳ ສົ່ງເຂົ້າຮ່ວມ ປະກອບມີ 7 ປະເພດຄື: ຍິງປືນ, ແລ່ນ-ລານ, ຫນ້າເກັກ, ເປຕັງ, ກະຕໍ້, ຫມາກຂ່າງ ແລະ ປິ່ງປ່ອງ. ໂດຍມີຄວາມຫວັງຄືຍາດໃຫ້ໄດ້ຫລຽນໃດຫລຽນຫນຶ່ງ.

ຮອງຜູ້ວ່າການທະນາຄານ ສ້າງຂັວນກຳລັງໃຈແກ່ນັກກິລາ

ທ່ານ ບຸນສົງ ສົມມາລາວົງ, ຮອງຜູ້ວ່າການທະນາຄານແຫ່ງ ສປປ ລາວ ພ້ອມຄະນະໄດ້ເດີນທາງມາໂອ້ລົມ ຄະນະນຳ, ຄູຝຶກ ແລະ ນັກກິລາ ຂອງ ທະນາຄານທີ່ໄດ້ ເດີນທາງມາຮ່ວມແຂ່ງຂັນ ງານມະຫາກຳກິລາແຫ່ງຊາດ ຄັ້ງທີ 8 ທີ່ ແຂວງ ຈຳປາສັກ ໃນທ້າຍອາທິດຜ່ານມາ. ໃນໂອກາດນີ້ ທ່ານ ບຸນສົງ ສົມມາລາວົງ ກໍ່ໄດ້ເນັ້ນຫນັກໃຫ້ນັກກິລາທຸກຄົນ ຈົ່ງຮັກສານ້ຳໃຈນັກກິລາໃຫ້ສູງເປັນອັນດັບຫນຶ່ງ ຄຽງຄູ່ກັບການຍາດແຍ່ງເອົາໄຊຊະນະໃນໄລຍະແຂ່ງຂັນກິລາ. ກໍ່ເປັນທີ່ຮັບຮູ້ກັນແລ້ວວ່າ ທຸກຄົນເມື່ອເວລາລົງແຂ່ງຂັນກໍ່ຕ້ອງການໄຊຊະນະສະເຫມີ ເຊິ່ງອາດຈະເຮັດໃຫ້ເກີດມີການສະແດງທ່າທີທີ່ບໍ່ເຫມາະສົມເມື່ອ ເວລາບໍ່ພໍໃຈຕໍ່ການຕັດສິນ ກໍ່ຄືເຫດການອື່ນໆລະຫວ່າງນັກກິລາທີມັກເກີດຂຶ້ນໃນເວລາແຂ່ງຂັນ, ດັ່ງນັ້ນ ເພື່ອຫລີກເວັ້ນເຫດການດັ່ງກ່າວ ຮຽກຮ້ອງໃຫ້ນັກກິລາທຸກຄົນ ກໍ່ຄືບັນດາຄູຝຶກ ຈົ່ງໄດ້ມີຄວາມອົດທົນ ຫລີກຫລ່ຽງການປະທະກັນ ເຊິ່ງຈະເຮັດໃຫ້ເກີດຜົນດີຕາມມາ ໃຫ້ສົມກັບວ່າ ນັກກິລາ ຄວນມີນ້ຳໃຈນັກກິລາສູງ ຮູ້ໄດ້ ຮູ້ເສຍ ແລະ ຮູ້ໃຫ້ອາໄພ.

ໃນໂອກາດນີ້ ທ່ານ ມິ່ງແກ້ວ ສະຫວັດດີ, ຄະນະທີ່ປຶກສາສະໂມສອນ ທະນາຄານ ກໍ່ສະແດງຄວາມເພິ່ງພໍໃຈຕໍ່ນັກກິລາທຸກຄົນທີ່ໄດ້ທຸ້ມເທທັງແຮງ ກາຍ ແລະ ແຮງໃຈເຂົ້າໃສ່ການແຂ່ງຂັນ ອັນໄດ້ເຮັດໃຫ້ຜົນງານປະກົດອອກມາດີຕາມລະດັບຄາດຫມາຍ. ສຳລັບທະນາຄານແຫ່ງ ສປປ ລາວ ສົ່ງນັກກິລາເຂົ້າຮ່ວມ ທັງຫມົດ 6 ປະເພດ ຄື: ເຕະບານ, ບານສົ່ງໃນຮົ່ມ, ກະຕໍ້, ແລ່ນ-ລານ, ເປຕັງ ແລະ ດອກປີກໄກ່, ໂດຍຕັ້ງຄວາມຫວັງ ໃຫ້ໄດ້ 10 ຫລຽນ ໃນນີ້ 4 ຫລຽນຄຳ, 2 ຫລຽນເງິນ ແລະ 4 ຫລຽນທອງ.

ມາເຖິງວັນທີ 15 ທັນວາ ທະນາຄານ ແຫ່ງ ສປປ ລາວ ສາມາດ ຍາດໄດ້ 2 ຫລຽນຄຳ ຈາກ ດອກປີກໄກ່ທີມຊາຍ, ເຕັ້ນ 3 ກ້າວຍິງ, 1 ຫລຽນເງິນ ຈາກ ເຕັ້ນ 3 ກ້າວຊາຍ ແລະ 3 ຫລຽນທອງ ຈາກກະຕໍ້ ຊຸດຊາຍ, ແກ່ວງຈານຍິງ ແລະ ເຕັ້ນ 3 ກ້າວຍິງ, ສ່ວນເຕະບານຊາຍ ທະນາຄານ ໄດ້ເຂົ້າຮອບ 8 ທີມສຸດທ້າຍ ເຊິ່ງເປັນທີ 2 ຂອງສາຍ ຂ:

ຄະນະກຳມະການທີ່ຮັບຜິດຊອບການ ຈັດງານມະຫະກຳກິລາແຫ່ງຊາດ ຄັ້ງທີ 8 ປະກອບມີ 12 ຄະນະກຳມະການ ຄື:

1. ຄະນະກຳມະການກອງເລຂາ 2. ຄະນະກຳມະການເຕັກນິກ

3. ຄະນະກຳມະການພິທີເປີດ - ປິດການແຂ່ງຂັນ 4. ຄະນະກຳມະການ

5. ຄະນະກຳມະການໂຄສະນາປະຊາສຳພັນພິທີການຍ້ອງຍໍ 6. ຄະນະກຳມະການປ້ອງກັນຊາດ - ປ້ອງກັນຄວາມສະຫງົບ

7. ຄະນະກຳມະການເສດຖະກິດ 8. ຄະນະກຳມະການຂົນສົ່ງ

9. ຄະນະກຳມະການສະຖານທີ່ 10. ຄະນະກຳມະການການແພດ ແລະ ສຸຂະພາບ

11. ຄະນະກຳມະການຄ້າຍເຍົາວະຊົນ 12. ຄະນະກຳມະການພື້ນຖານໂຄງລ່າງ

ສູນຂ່າວຈຳປາສັກເກມ ເປີດໃຫ້ບໍລິການ ຢ່າງເປັນທາງການ

ສູນ ຂ່າວ ຫລື MPC ປະຈຳງານ ກິລາແຫ່ງຊາດ ຄັ້ງທີ VIII ຫລື ຈຳປາສັກ ເກມ ໄດ້ເປີດໃຫ້ນຳໃຊ້ ແລະ ໃຫ້ບໍລິການແກ່ສື່ມວນຊົນ ທຸກຂະແຫນງ ທັງສູນກາງ ແລະ ທ້ອງຖິ່ນ ຢ່າງເປັນທາງການ ໃນວັນທີ 09 ທັນວາຜ່ານມາ ຂະນະທີ່ຜູ້ຮັບຜິດຊອບສູນຂ່າວ ຫມັ້ນໃຈກັບລະບົບ ສິ່ງອຳນວຍຄວາມສະດວກ ຂອງສູນຂ່າວ ຈະສາມາດສະຫນອງ ຂໍ້ມູນຂ່າວສານ ແລະ ເຜີຍແຜ່ໂຄສະນາ ງານແຂ່ງຂັນ ໄດ້ຢ່າງທົ່ວເຖິງ ແລະ ມີປະສິດທິພາບ.

ອີງຕາມການໃຫ້ສຳພາດ ຂອງທ່ານ ສຸກສາຄອນ ສີປະເສີດ, ຫົວຫນ້າພະແນກໂຄສະນາຂ່າວສານ ຂອງຄະນະກຳມະການກິລາແຫ່ງຊາດ ທັງເປັນຫົວຫນ້າສູນຂ່າວ ປະ ຈຳງານຈຳປາສັກ ເກມ ໄດ້ເປີດເຜີຍໃຫ້ຮູ້ໃນເຊົ້າວານນີ້ (10 ທັນວາ) ວ່າ: “ເນື່ອງ ຈາກທາງຂັ້ນເທີງ ກໍຄືຄະນະປະທານຈັດງານ ເຫັນໄດ້ຄວາມສຳຄັນ ຂອງວຽກງານສື່ມວນຊົນ ໂດຍສະເພາະສູນຂ່າວ ຕ້ອງເປັນເສນາທິການໃຫ້ກັບ ກອງເລຂາຄະນະຈັດງານ ໂດຍສະເພາະສູນຂ່າວ ຕ້ອງເຮັດຫນ້າທີ່ໃນການຊ່ວຍປະສານງານ, ຕິດຕໍ່ພົວພັນ ລະຫວ່າງ ສື່ມວນຊົນ ກັບການເຄື່ອນໄຫວທີ່ປິ່ນອອ້ມງານ ແຂ່ງຂັນ ບໍ່ວ່າຈະເປັນການຕິດຕໍ່ສຳພາດ ຄະນະນຳ, ຄະນະຮັບຜິດຊອບທີມ, ຄະນະຈັດການແຂ່ງຂັນ, ຄູຝຶກ, ນັກກິລາ ຫລື ລວມເຖິງນິຕິບຸກ ຄົນ ທີ່ສື່ມວນຊົນຈາກຂະແຫນງການຕ່າງໆ ທັງໃນ ແລະ ຕ່າງປະເທດ. ປັດຈຸບັນ ສູນຂ່າວ ຈຳປາສັກ ເກມ ໄດ້ເປີດໃຫ້ບໍລິການ ແກ່ສື່ມວນຊົນ ຢ່າງເປັນທາງການ ມາແຕ່ວັນທີ 09 ທັນວາ ຜ່ານມາ ຫລັງຈາກທາງຄະນະກຳມະການໂຄສະນາ ປະຊາ ສຳພັນ ໄດ້ໃຫ້ຄວາມເອົາໃຈໃສ່ ແລະ ຫ້າງຫາກະກຽມ ທັງດ້ານສະຖານທີ່ ແລະ ອຸປະ ກອນສິ່ງອຳນວຍຄວາມສະດວກ ໃສຳລັບສູນຂ່າວ ເຊັ່ນ: ການຕິດຕັ້ງໂທລະສັບ, ແຟ໋ກ ລວມເຖິງອິນເທີເນັດ ຄວາມໄວສູງ ເຊິ່ງສາມາດຕອບສະຫນອງໃຫ້ແກ່ການລາຍງານຂ່າວ, ສົ່ງຮູບພາບ ທັງນິ້ງ ແລະ ເຫນັງ ໄດ້ຢ່າງມີປະສິດທິພາບ”.

ທ່ານ ສຸກສາຄອນ ສີປະເສີດ ຍັງເປີດເຜີຍອີກວ່າ: “ເຖິງ ວ່າງານກິລາແຫ່ງຊາດ ຄັ້ງທີ VIII ຈະຍັງບໍ່ທັນໄດ້ມີພິທີເປີດ ຢ່າງເປັນທາງການ ກໍຕາມ, ແຕ່ເນື່ອງຈາກບາງປະເພດກິລາ ເຊັ່ນ: ເຕະບານ, ເຕະຕໍ້, ບານສົ່ງ ກໍໄດ້ມີການເປີດການແຂ່ງຂັນກັນແລ້ວ, ດັ່ງນັ້ນ ສູນຂ່າວຕ້ອງມີຄວາມພ້ອມທີ່ຈະຮອງຮັບ ໃຫ້ກັບງານຄັ້ງນີ້. ແລະ ມາເຖິງເວລານີ້ ກໍໄດ້ມີສື່ມວນຊົນບາງຂະແຫນງ ທີ່ມາຈາກສູນກາງ ແລະ ທ້ອງຖິ່ນ ເຂົ້າມານຳໃຊ້ ແລະ ບໍລິການ ຢ່າງເປັນປົກກະຕິ”.

ສູນຂ່າວຈຳປາສັກ ເກມ ຕັ້ງຢູ່ກ້ອງອັດທະຈັນເບື້ອງຊ້າຍ ຂອງສະຫນາມກິລາແຂວງ (ສະຫນາມເປີດ-ປິດ) ນອກຈາກຈະມີການຕິດຕັ້ງລະບົບອິນເທີເນັດຄວາມໄວສູງ, ໂທລະສັບ ແລະ ແຟ໋ກ ທີ່ພຽງພໍ ສຳລັບການລາຍງານຂ່າວ ຂອງສື່ມວນຊົນຈາກຂະແຫນງ ຕ່າງໆ ແລ້ວ ສູນຂ່າວຍັງເປັນບ່ອນສັງລວມ ຜົນການແຂ່ງຂັນ, ສະຖິຕິ, ຕາຕະລາງການ ແຂ່ງຂັນ, ແລະ ການເຄື່ອນໄຫວອື່ນໆ ທີ່ປິ່ນອອ້ມ ງານຄັ້ງນີ້ ສຳລັບສື່ມວນຊົນ.

ເຈົ້າພາບ ປະເດີມສະຫນາມ ປະທັບໃຈກອງເຊຍ ຫລັງຈາກຖະຫລົ່ມ ອັດຕະປື 5-0 ໃນຈຳປາສັກ ເກມ!

ທີມເຕະບານເຈົ້າພາບ (ແຂວງຈຳປາສັກ) ລົງປະເດີມສະຫນາມນັດທຳອິດ ໃນຈຳປາ ສັກ ເກມ ໄດ້ຢ່າງງົດງາມ ແລະ ປະທັບໃຈກອງເຊຍເຈົ້າບ້ານ ຫລັງຈາກຖະຫລົ່ມທີມຮ່ວມພາກ ດຽວກັນ “ອັດຕະປື” ໄປຢ່າງຂາດຮອຍ 5 ປະຕູຕໍ່ 0 ໂດຍ ດາວ ໂຄດໄຊຍາ ແລະ ວິໄລສັກ ໂພທິ ລາດ ຍິງ ຄົນລະສອງປະຕູ ຂະນະທີ່ ນະຄອນຫລວງ “ແຊ໋ມເກົ່າ” ຟອມຝືດ ເຮັດໃຫ້ພຽງສະເຫມີ ບໍລິຄຳໄໍຊ 1-1.

ການແຂ່ງຂັນນັດເປີດສະຫນາມ ຢ່າງບໍ່ເປັນທາງການ ໃນກິລາປະເພດບານເຕະ ໄດ້ ເລີ່ມເປີດສາກຂຶ້ນໃນຕອນບ່າຍຂອງມື້ວານນີ້ (ວັນທີ 09 ທັນວາ) ເຊິ່ງມີທັງຫມົດ 4 ຄູ່ ແຕ່ໄຮໄລ ຫລື ຄູ່ທີ່ໄດ້ຮັບຄວາມສົນໃຈຫລາຍ ຕ້ອງຍົກໃຫ້ທີມເຈົ້າພາບ ພົບກັບທີມຮ່ວມເຂດດຽວກັນ “ອັດ ຕະປື” ເຊິ່ງທັງສອງຢູ່ໃນສາຍງໍ ຫລື (D).

ເລີ່ມການແຂ່ງຂັນໃນເຄິ່ງເວລາທຳອິດ ຈຳປາສັກໄດ້ປະຕູຂຶ້ນໄວໄປກອ່ນ 1-0 ເມື່ອ ສຸບັນດິດ ທຳມະວົງ ເຕະເປີດຍາວມາແຕ່ເຄິ່ງສະຫນາມ ເຂົ້າຫນ້າເຂດໂທດ ຂອງອັດຕະປື ກອ່ນທີ່ “ດາວ ໂຄດໄຊຍາ” ນັກເຕະຈາກສະໂມສອນ ລາວ-ອາເມລິກາ ທີ່ແລ່ນແຊງກອງຫລັງ ອັດຕະປືຂຶ້ນມາ ກອ່ນຈະເອົາບານລົງຈັງຫວະຫນຶ່ງ ແລ້ວຍິງເຕັມຕີນຂວາ ບານຟົ້ງເຂົ້າກົ້ນປະຕູ ອັດຕະປື ໄປຢ່າງສວຍງາມ. ຫລັງຈາກເສຍປະຕູໄວ, ອັດຕະປື ບໍ່ຍອມຖອດໃຈ ຍັງສາມາດ ຫລິ້ນກັນໄດ້ດີ ແລະກໍມີໂອກາດສ້າງຄວາມຫວາດສຽວຕື່ນເຕັ້ນ ໃຫ້ກັບກອງເຊຍເຈົ້າພາບ ຫລາຍຄັ້ງ ແຕ່ກອງຫນ້າຂາດຄວາມຄົມ ກໍເລີຍໄດ້ແຕ່ວືດໄປວືດມາເທົ່ານັ້ນ. ຈົນມາເຖິງນາທີໆ 25 ກອງເຊຍຈຳປາສັກ ກໍໄດ້ໂຮລັ່ນສະຫນາມ ເມື່ອ “ວິໄລສັກ ໂພທິລາດ”, ນັກເຕະອີກຄົນ ທີ່ມາຈາກສະໂມສອນ ລາວ-ອາເມລິກາ ລາກບານຈາກເຄິ່ງສະຫນາມມາທາງດ້ານຊ້າຍ ເກືອບ ເຖິງເສັ້ນຫລັງ ແລ້ວຜ່ານເຂົ້າມາຫນ້າປະຕູ ອັດຕະປື ແລະກໍເປັນ ດາວ ໂຄດໄຊຍາ ຄົນເດີມ ທີ່ ເຕີມມາຈາກດ້ານຫລັງ ແລ້ວອັດເຂົ້າໄປເສົາສອງຢ່າງສວຍງາມ ພາຈຳປາສັກ ຫນີໄປເປັນ 2-0.

ຫລັງຈາກເສຍສອງປະຕູທີສອງ, ນັກເຕະອັດຕະປື ເລີ່ມຄວບຄຸມເກມບໍ່ໄດ້ ເຮັດໃຫ້ ຈຳປາສັກ ຍັງສືບຕໍ່ສ້າງສັນເກມ ແລະ ຫາໂອກາດຍິງປະຕູເພີ່ມອີກ. ຈົນມາເຖິງໄລຍະທົດເວລາ ຈຳປາສັກກໍມາໄດ້ປະຕູທີສາມ ຈາກວິໄລສັກ ໂພທິລາດ. ຈົບເຄິ່ງເວລາທຳອິດ ຈຳປາສັກ ນຳໄປກອ່ນ 3-0.

ໃນເຄິ່ງເວລາທີສອງ ຍັງເປັນເກມຂອງຈຳປາສັກ ທີ່ຄວບຄຸມສະຖານະການໄດ້ທັງຫມົດ ເຮັດໃຫ້ຈຳປາສັກ ສາມາດຍິງໄດ້ອີກສອງປະຕູ ຈາກທັນວາ ພັນທະວົງ ໃນນາທີໆ 66 ແລະ ຈາກວິໄລສັກ ໂພທິລາດ ນາທີໆ 84. ຈົບເກມ ຈຳປາສັກ ຖະຫລົ່ມ ອັດຕະປື ໄປຢ່າງຂາດຮອຍ 5-0 ມີຄະແນນຂຶ້ນນຳເປັນທີຫນຶ່ງໃນສາຍງໍ ທັນທີ.

ສຳລັບຜົນການແຂັ່ງຂັນ ຄູ່ກອ່ນເຈົ້າພາບ ໃນສາຍກໍ ປະກົດວ່າ ກະຊວງໂຍທາທິການ ສອຍຊະນະແຂວງຫົວພັນ ໄປແບບບີບຫົວໃຈກອງເຊຍທັງສອງຝ່າຍ ດ້ວຍປະຕູ 4-3 ເຖິງ ວ່າໃນເຄິ່ງເວລາທຳອິດ ໂຍທາທິການ ຈະນຳໄປກອ່ນເຖິງ 3 ປະຕູຕໍ່ 0 ກໍຕາມ. ໃນຂະນະທີ່ ຜົນຂອງການແຂ່ງຂັນອີກສອງຄູ່ ໃນສະຫນາມວິທະຍາໄລສ້າງຄູປາກເຊ ປະກົດວ່າ ໃນສາຍຂໍ ແຊ໋ມເກົ່າ “ນະຄອນຫລວງ” ປະເດີມສະຫນາມໄດ້ຢ່າງຫນ້າຜິດຫວັງກອງເຊຍ ຫລັງຈາກສາ ມາດເຮັດໄດ້ ພຽງສະເຫມີບໍລິຄຳໄຊ 1-1. ສ່ວນອີກຄູ່ໃນສາຍດຽວກັນ ທະນາຄານ ກໍເອົາຊະນະ ສາລະວັນ ໄປຕາມຟອມ 3 ຕໍ່ 0.

ສຳລັບຕາຕະລາງແຂ່ງຂັນເຕະບານໃນມື້ນີ້ ວັນທີ 10 ທັນວາ ຍັງມີການແຂ່ງຂັນກັນອີກ 4 ຄູ່ ເຊັ່ນເຄີຍ ແຕ່ເປັນເຕະບານຍິງຫນຶ່ງຄູ່ ຄືໃນຕອນເຊົ້າເວລາ 08:00 ໂມງ ແຂວງຄຳມ່ວນ ພົບ ນະຄອນຫລວງ; ສ່ວນເຕະບານຊາຍ ເວລາ 13:30 ໂມງ ສະຫວັນນະເຂດ ພົບ ຫລວງ ພະບາງ, 15:30 ໂມງ ແຂວງວຽງຈັນ ພົບ ແຂວງຄຳມ່ວນ ແລະ ກະຊວງ ປ.ກ.ສ ພົບ ແຂວງເຊກອງ.